Se se ricordassimo

Ormai, anca sto ano, el xe su i paraori,

co tuta na valisa de zogie e de dolori,

tegnindo, per la man, un so compagno novelo,

che de lu xe più sgagio, più zovin, più belo.

Lu, el xe vecio, el xe stanco, el se pusa al baston,

lu, el gà un gran rimorso, perché no el xe stà bon

de portar, in sto mondo, anca un poca de pase,

e de aver fato pianzer anca i muri de le case.

Lu, el gà soto el scagio, el gran libro de i conti,

del dar e de l’aver, co i do saldi zà pronti,

che, de quelo che el gà visto e de quelo che el gà fato,

el gà da renderghe conto al Re del Creato.

Quelo novo, el gà molà, cussì, a spiron batuo,

el bocia no sa gnanca perché el xe qua vegnuo,

lu, el gà visto el nono, si o no, mezo minuto,

restando po’ da solo e proprio nuo del tuto.<

Ma zà, tuti noialtri, apena che lo vedemo,

ghe femo na gran festa e se lo cocolemo,

sperando che el ne porta, al conto po’ de i fati,

trecento e po’ sessanta cinque zorni beati.

E cussi, ogni ano, la xe la stessa storia,

perché tuti noialtri manchemo de memoria,

savendo che, anca questo, come quelo che xe stà,

a la fin saluderemo, come l’ano passà.

Elio Ferrari